五月底六月初，一行十二人齊齊整整出發到布吉！今次旅程非常獨特，完全無itin，只因知道淨係喺villa已經足夠。朋友BonBon非常有心，今次專門搵咗一個非常豪華嘅困獸鬥，淨係睇相已經唔想去其他地方。
到達布吉機場，兩部專車迎候，接我哋到villa，車程大概三十分鐘。有時選擇酒店，相片可圈可點，可以非常老點。不過，到達villa嘅時候，眾人即刻嘩聲四起，跳跳紮衝入去！因為相片冇欺騙之餘，仲感覺再大一點。正門旁邊為一個小型足球場，有個小小彈床，入門以後就係大廳，係真係好大嘅客廳！客廳對住無敵落地大玻璃，外面就係25米游泳池！大客廳旁有個偏廳， 另有通往三間房間嘅通道。大廳另一面為開放式廚房及飯廳，有張可坐十二人嘅長餐枱。實際煮飯嘅地方係另外一邊，唔關我哋事，事實我哋從來唔需要下廚！扶手樓梯直上二樓另外三個房間。泳池旁有幾張沙灘椅，另有一張大四方枱，可以pool side bbq。前面一大塊草地，對開為一個涼亭，面向無敵natai beach！
係咪覺得五日四夜大部分時間都喺間屋裡面，好似好悶咁呢？由於係一大班不知死活嘅馬騮，玩呢部分點會難倒我哋呢？游水曬太陽係每日指定動作，淨係喺泳池都已經玩咗好多日，包括躲避球dodgeball，25x3接力賽，彈弓人，影飄浮相，韻律泳。而屋前嘅彈床又玩咗兩日，仲條爛埋，yuck！前後草披地加房與房穿插，竟然俾我哋諗到玩running man，死未！仲有，朋友帶咗條slackline，其實真係唔容易，淨係企上去要平衡都唔簡單。至於室內，有踢毽，迷你麻雀，poker，killer，其他啤牌game，真係冇一刻停過！不過，要休息嘅時候，大家就會靜落嚟，做自己想做嘅事，例如瞓覺，打機，睇戲，睇書，做公司嘢，非常relax。
呢個trip大家非常難忘，下次都會再去搵另一個villa，繼續relax一番！
阿力好有心機嘅作品，請慢用！
